Yaaden

Aftab Shamsi

raat ke gahre sannate men

main ghar ke angan men tanha

chand ko kab se dekh raha huun

dil ki divaron ko kab se

gham ki dimak chaat rahi hai

zehn ke lambe se kamre men

mere maazi ki almari

jis ke donon hi dar va hain

ghaur se mujh ko dekh rahi hai

ji men ye aata hai mere

maazi ki is almari se

jis men buri bhali sab yaden

uupar niche chuni hui hain

chand suhani yaden le luun

aur saja luun dil men apne

lekin soch ke ye darta huun

gham ki dimak un yadon ko

do hi pal men chaat na jaae

yadon ki ye pyari shaklen

phir main kaise dekh sakunga!