tamam shahr men us jaisa ḳhasta-hal na tha
magar vo shaḳhs ki phir bhi koi malal na tha
ye aur baat main apni ana men qaid raha
vagarna us ka pighalna to kuchh muhal na tha
bichhaḌ gaya hai to ye kah ke dil ko bahlaun
vajud us ka mire haq men nek-fal na tha
samajh raha tha muhafiz jise main barson se
mujhi ko qatl karega ye ehtimal na tha
simaT ga.i hai sabhi ke ḳhulus ki chadar
ye jazba pahle to is darja pa.emal na tha
ḳhamosh sunte rahe sab amir-e-shahr ka hukm
kisi ke lab pe koi harf-e-ishti.al na tha
Leave a Reply