Sufi
jab asman par mah-o-akhtar palat kar aae
ham rukh pe din ki dhuup liye ghar palat kar aae
nazzara jin ka bais-e-rahm-e-nigah tha
ankhon ke samne vahi manzar palat kar aae
har ghar sulag raha tha ajab sard aag men
jab arsa-gah-e-jang se lashkar palat kar aae
sad-rashk-e-iltifat tha jab us ka jaur bhi
ji kyuun na chahe phir vo sitamgar palat kar aae
jo baat guftani thi vahi an-kahi rahi
be-ras jo tazkire the zaban par palat kar aae
duniya se ho gae na hon azurda-dil kahin
phir is zamin par na payambar palat kar aae
ye baat agar hai sach ki palatta nahin hai vaqt
lamhat-e-gham mire liye kyuun kar palat kar aae
kahte hain us ne dekhi thi kal ek jal-pari
har lab pe hai dua ki shanavar palat kar aae
ai ‘abid’ asman pe na kuchh bhi asar hua
mujh par hi meri aah ke patthar palat kar aae
Leave a Reply