main ne kaha ki daava-e-ulfat magar ghalat
kahne lage ki haan ghalat aur kis qadar ghalat
tasir-e-ah-o-zari-e-shab-ha-e-tar jhuut
avaza-e-qubul dua-e-sahar ghalat
soz-e-jigar se hont pe tabkhala iftira
shor-e-fughan se jumbish-e-divar-o-dar ghalat
haan siine se numaish dagh-e-darun darogh
haan aankh se taravish-e-khun-e-jigar ghalat
aa jaae koi dam men to kya kuchh na kijiye
ishq-e-majaz-o-chashm-e-haqiqat-nigar ghalat
bos-o-kanar ke liye ye sab fareb hain
izhar-e-pak-bazi-o-zauq-e-nazar ghalat
lo sahab aftab kahan aur ham kahan
ahmaq banen ham is ko na samjhen agar ghalat
siine men apne jante ho tum ki dil nahin
ham ko samajhte ho ki hai in ki kamar ghalat
kahna ada ko tegh khushamad ki baat hai
siine ko apni us ki samajhna sipar ghalat
mitti men kya dhari thi ki chupke se saunp di
jan-e-aziz peshkash-e-nama-bar ghalat
puchho to koi mar ke bhi karta hai kuchh kalam
kahte ho jaan di hai sar-e-rah-guzar ghalat
ham puchhte phiren ki janaza kidhar gaya
marne ki apni rose udani khabar ghalat
aayat nahin hadis nahin jis ko maniye
hai nazm-o-nasr ahl-e-sukhan sar-basar ghalat
ye kuchh suna javab men ‘nazim’ sitam kiya
kyuun ye kaha ki daava-e-ulfat magar ghalat
Leave a Reply