Sufi

Ilahi Kya Kabhi Pure Ye Arman Ho Bhi Sakte Hain

ilahi kya kabhi puure ye arman ho bhi sakte hain

mire kashana-e-dil men vo mehman ho bhi sakte hain

koi sayyad se puchhe ki o na-vaqif-e-ulfat

ye divane kahin paband-e-zindan ho bhi sakte hain

bata ai khizr rah-e-ishq men manzil hai aisi bhi

kahin ham vaqif-e-asrar-e-janan ho bhi sakte hain

zaban-e-shauq par chha jaega mayusi-e-paiham

lab-e-khamosh rudad-e-dil-o-jan ho bhi sakte hain

ba-pas-e-ehtiram-e-ishq ham khamosh hain varna

pareshan kar bhi sakte hain pareshan ho bhi sakte hain

kabhi ai dida-e-khun-baz tu ne ye bhi socha hai

ye tohfe baryab-e-bazm-e-janan ho bhi sakte hain

nizam-e-zindagi ‘abrar’ kab tak darham-o-barham

kahin yakja ye auraq-e-pareshan ho bhi sakte hain

More Poems

Leave a Comment