Gauhar Hoshiyarpuri
saman-baron se chaman daulat-e-numu mange
hava-e-daman-e-gul gesuon ki bu mange
taraz-e-shoḳhi-e-pa hai gyah-e-sabz ki maang
ḳhiram-e-naz ka andaz ab-ju mange
bikharti zulf se TuuTe ghurur-e-shab ka tilism
sahar ka husn fusun-e-ruḳh-e-niku mange
varaq varaq gul-e-tar mauj mauj bad-e-sahar
badan ka lams tire pairahan ki bu mange
shigaf-e-koh na tha tesha-e-vafa ki talab
ye ju-e-shir abhi aur kuchh lahu mange
shikasta-e-shisha-e-pindar ki sada bhi sun
karam ki bhiik jab us sang-dil se tu mange
kahan vo shoḳh magar apna nutq-o-lab ‘gauhar’
usi ka zikr pa.e-zeb-e-guftugu mange
Leave a Reply