Usha Bhadoriya
akasr tanha.i se mil kar ro.e hain
ham ne apne ashk aag se dho.e hain
bahut nibha.i len-den ki rasmen bhi
kuchh aansu paa.e hain kuchh gham kho.e hain
jab bhi barish ne miTTi se munh moḌa
jalte suraj ne zarrat bhigo.e hain
ḳhabar jahan milti hai apne hone ki
ham us manzil par bhi kho.e kho.e hain
jab ḳhud ko paana hi mushkil kaam hua
kyuun kachche dhage men phuul piro.e hain
bal-o-par paate hi uḌe havaon men
ham ne jo nazdik ke rishte Dho.e hain
tum ko kya malum miri tanha.i ne
lafzon men apne jazbat samo.e hain
ham kya janen ḳhvabon ki narmi kya hai
ham kab ḳhushbu ki banhon men so.e hain
baha na le jaa.e un ko barish ‘usha’
chaTTanon par ḳhvab vafa ke bo.e hain
Leave a Reply