Kis Qadar Mahdud Kar Deta Hai Gham Insan Ko

kis qadar mahdūd kar detā hai ġham insān ko

ḳhatm kar detā hai har ummīd har imkān ko

giit gaatā bhī nahīñ ghar ko sajātā bhī nahīñ

aur badaltā bhī nahīñ vo saaz ko sāmān ko

itne barsoñ kī riyāzat se jo qaa.em ho sakā

aap se ḳhatra bahut hai mere is īmān ko

koī ruktā hī nahīñ is kī tasallī ke liye

dekhtā rahtā hai dil har ajnabī mehmān ko

ab to ye shāyad kisī bhī kaam aa saktā nahīñ

aap hī le jā.iye mere dil-e-nādān ko

shahr vāloñ ko to jaise kuchh patā chaltā nahīñ

roktā rahtā hai sāhil roz-o-shab tūfān ko

Leave a Comment