Meer Hasan
ghair ko tum na aankh bhar dekho
kya ghazab karte ho idhar dekho
khaak men mat milao dil ko mire
ji men samho tuk apna ghar dekho
dekhna zulf-o-rukh tumhen har vaqt
shaam dekho na tum sahar dekho
gul hue jaate hain charagh ki tarah
ham ko tuk jald aan kar dekho
aap pe apna ikhtiyar nahin
jabr hai ham par kis qadar dekho
raam baton men to vo ho na saka
naqsh o afsun bhi koi kar dekho
lakht-e-dil tum na samho mizhgan par
ashiqi ka ye hai samar dekho
vasl hota nahin bhala kyunkar
apni hasti se to guzar dekho
dekhte hi nahin to kya kahiye
kahiye tab haal kuchh agar dekho
dhalte ho tum butan udhar dil se
aj-kal jis ke haath zar dekho
ishq-bazi se baaz aao ‘hasan’
chhod do apna ye hunar dekho
Leave a Reply