Moosa Raza
kabhi vo dost kabhi fitna-saz lagta hai
vo dekhne men baḌa dil-navaz lagta hai
ghazab men aa.e to atish mizaj ban jaa.e
vo mehrban ho to mahfil-gudaz lagta hai
jahan ka dard bhara hai mizaj men us ke
vo ek ham se faqat be-niyaz lagta hai
vo toḌta bhi hai dil ik ada-e-naz ke saath
sitamgari men bhi vo charasaz lagta hai
jafa.en us ki vo maqbul-e-am hain itni
hamara shikva bahut be-javaz lagta hai
main sar-ba-sajda hua us ke dar pe to puchha
ye kaun shaḳhs hai mahv-e-namaz lagta hai
miri fughan pe ba-andaz-e-dad us ne kaha
tumhara sher bahut dil-gudaz lagta hai
Leave a Reply