har ik qayas haqiqat se dur-tar nikla
kitab ka na koi dars mo’tabar nikla
nafas tamam hua dastan ḳhatm hui
jo tha tavil vahi harf muḳhtasar nikla
jo gard saath na uḌti safar na yuun kaTta
ghubar-e-rahguzar mauj-e-bal-o-par nikla
mujhe bhi kuchh na.e teshe sambhalne hi paḌe
purane ḳhol ko jab vo bhi toḌ kar nikla
faza kushada nahin qatl-gah ki ye kahan
mire lahu ka parinda uḌaan par nikla
vo aadmi ki jo mahmil tha aftabon ka
ba-qadr-e-yak-do kaf-e-ḳhak-e-rahguzar nikla
ye raat jis ke liye main ne jaag kar kaaTi
mila vo shaḳhs to ḳhvabon ka ham-safar nikla
uḌha di chadar-e-ismat ise ḳhayalon ne
har ek lafz zaban se barahna-sar nikla
‘faza’ tum uljhe rahe fikr o falsafe men yahan
ba-nam-e-ishq vahan qur.a-e-hunar nikla
Leave a Reply