isi jagah pe andheron ke ghol palte hain
so bam-o-dar pe charaghon ka nuur malte hain
vo ḳhush-ḳhisal agar dastaras men aa jaa.e
hamare haath hamare labon se jalte hain
tumhare hijr ko faqa-kashi nahin saunpi
tumhare dard mire ansuon pe palte hain
tumhare qurb ki hiddat ka hi tamasha hai
zara zara sa jo ham raat bhar pighalte hain
mira nasib hai aise maqam-e-ibrat par
jo haath rakhte nahin hain vo haath malte hain
hamari aankh ko mat saunp ye mata-e-giran
ki tere ḳhvab in ankhon se kab sanbhalte hain
tumhari chup ka taqaza hai ḳhali-pan ‘abdul’
na sar jhukao ḳhudara faqir chalte hain
Leave a Reply