Irfan Sattar
is tarah dekhta huun udhar vo jidhar na ho
jaise dikha.i de koi surat magar na ho
ye shahr-e-na-shanas hai kya is ka e’tibar
achchha rahega vo jo yahan mo’atabar na ho
is tarah chal raha hai ra.unat ke saath vo
jaise ḳhiram-e-naz se aage safar na ho
main aaj huun so mujh ko sama.at bhi chahiye
mumkin hai ye suḳhan kabhi bar-e-digar na ho
hone do aaj shaḳh-e-tamanna ko barvar
mumkin hai kal nafas ka yahan se guzar na ho
main bhi dikha.un shauq ki jaulaniyan tujhe
ye musht-e-ḳhak raah men haa.il agar na ho
nam-o-numud se mujhe aise gurez hai
jaise ye kar-e-ḳhair ho kar-e-hunar na ho
apna pata bhi DhunDne jaana hai ek din
filhal chahta huun ki tu dar-ba-dar na ho
ik ye fareb dekhna baaqi hai vaqt ka
dil Duub jaa.e aur dobara sahar na ho
ye kya ki ham-rikab rahe ḳhak-e-rahguzar
kis kaam ka junun jo qadam dasht-bhar na ho
Leave a Reply