kiye aarzu se paiman jo maaal tak na pahunche
shab-o-roz-e-ashnai mah o saal tak na pahunche
vo nazar baham na pahunchi ki muhit-e-husn karte
tiri diid ke vasile khad-o-khal tak na pahunche
vahi chashma-e-baqa tha jise sab sarab samjhe
vahi khvab mo’tabar the jo khayal tak na pahunche
tira lutf vajh-e-taskin na qarar sharah-e-gham se
ki hain dil men vo gile bhi jo malal tak na pahunche
koi yaar jaan se guzra koi hosh se na guzra
ye nadim-e-yak-do-saghar mire haal tak na pahunche
chalo ‘faiz’ dil jalaen karen phir se arz-e-janan
vo sukhan jo lab tak aae pe saval tak na pahunche
Leave a Reply