dil-O-dimagh Ko Ro Lunga Aah Kar Lunga

Akhtar Shirani

dil-o-dimagh ko ro lunga aah kar lunga

tumhare ishq men sab kuchh tabah kar lunga

agar mujhe na milin tum tumhare sar ki qasam

main apni saari javani tabah kar lunga

mujhe jo dair-o-haram men kahin jagah na mili

tire khayal hi ko sajda-gah kar lunga

jo tum se kar diya mahrum asman ne mujhe

main apni zindagi sarf-e-gunah kar lunga

raqib se bhi milunga tumhare hukm pe main

jo ab talak na kiya tha ab aah kar lunga

tumhari yaad men main kaat dunga hashr se din

tumhare hijr men raten siyah kar lunga

savab ke liye ho jo gunah vo ain savab

khuda ke naam pe bhi ik gunah kar lunga

harim-e-hazrat-e-salma ki samt jaata huun

hua na zabt to chupke se aah kar lunga

ye nau-bahar ye abru, hava ye rang sharab

chalo jo ho so ho ab to gunah kar lunga

kisi hasine ke maasum ishq men ‘akhtar’

javani kya hai main sab kuchh tabah kar lunga