Rahi Shahabi
mai mile ya na mile rasm nibha li jaa.e
ḳhali botal hai to ḳhali hi uchhali jaa.e
ham bhi hain sina-sipar aap bhi shamshir-ba-kaf
baat to jab hai koi vaar na ḳhali jaa.e
ghar ke angan men ta.assub ki ye saḌti hui laash
kitne din biit ga.e ab to uTha li jaa.e
kya ta.ajjub hai ki kuchh sote hue jaag uThin
suuni basti men ik avaz laga li jaa.e
kal jo aa.en vo andheron men na bhaTken ‘rahi’
laao ik sham.a sar-e-rah jala li jaa.e
Leave a Reply