chehra udaas udaas tha maila libas tha
kya din the jab ḳhayal-e-tamanna libas tha
uryan zamana-gir sharar-gun jibillaten
kuchh tha to ek barg-e-dil un ka libas tha
us moḌ par abhi jise dekha hai kaun tha
sambhali hui nigah thi saada libas tha
yadon ke dhundle des khili chandni men raat
tera sukut kis ki sada ka libas tha
aise bhi log hain jinhen parkha to un ki ruuh
be-pairahan thi jism sarapa libas tha
sadiyon ke ghaaT par bhare melon ki bhiiḌ men
ai dard-e-shadman tira kya kya libas tha
dekha to dil ke samne sayon ke jashn men
har aks-e-arzu ka anokha libas tha
‘amjad’ qaba-e-shah thi ki chola faqir ka
har bhes men zamir ka parda libas tha
Leave a Reply