chain ho ya bechaini ho pahle dil ghabra.ega
jaate jaate ja.egi aate aate aa.ega
qasid aane jaane men thak thak kar ghabra.ega
ja.ega phir aa.ega aa.ega phir ja.ega
DhunDne vaali nazron nazron dekhenge pahlu ki taraf
un ki is dil-jui par mera dil itra.ega
dil men ummiden lakhon thiin kuchh niklin hain kuchh baaqi hain
ḳhair kabhi phir aaoge phir kabhi dekha ja.ega
dair-o-haram ke malik se ham kuchh mangen bhi to sahi
hai vo baḌa dene vaala dega ya dilva.ega
dil ke ḳhud azar-o-alam dil ki qadr baḌha.enge
hoga ye iksir magar ḳhaak men jab mil ja.ega
naseh aane vaala hai do hi baten honi hain
ya use ham samjha.enge ya vo hamen samjha.ega
shikva-e-gham ki mahshar men ham ko to ummid nahin
samne vo aa ja.enge hosh kise rah ja.ega
dil dene vaala gham se chhuT ja.ega dil de kar
dil lene vaala dil men dil le kar pachhta.ega
‘nuh’ ke rone par hansna bedardon ka ḳhvab nahin
bahr-e-mohabbat men is se aur bhi tufan aa.ega
Leave a Reply