na but-kade men na ka.abe men sar jhukane se
sukun mila hai tiri anjuman men aane se
mire junun ko mohabbat se dekhne vaale
zara nigah bacha.e hue zamane se
main muskura to diya un ki be-niyazi par
ye kya ki dil pe lagi choT muskurane se
bahut kiya hai haqiqat ki talḳhiyon se gurez
magar bahal na saka dil kisi fasane se
ḳhusha ki ahd-e-qafas men bhi zindagi ke liye
nigah khelti rahti hai ashiyane se
udaas dil ko sahara na mil saka ‘javed’
andheri shab men sitaron ke jagmagane se
Leave a Reply