Wahi Shikasta Cycle Wahi Udas Zindagi

vahī shikasta cycle vahī udaas zindagī

tire liye to kuchh nahīñ hamāre paas zindagī

ye koh-o-dasht-o-rahguzār DhūñDte rahe tujhe

kise ḳhabar ki hai kahāñ tirā nivās zindagī

ajiib mas.aloñ meñ hai hayāt-e-jāvidāñ mirī

yaqīn lā-vajūdiyat magar qayās zindagī

tujhe to sabz jañgaloñ kī rañg-o-bū se vāsta

tirī giraft meñ kahāñ ye sabz ghaas zindagī

hameñ bhī ghun lagā ga.ī umīd-e-be-karāñ tirī

tujhe bhī chāTtī rahī hamārī aas zindagī

Leave a Comment