Mohammad Naim Jawed Naim
narava tha na-munasib tha magar achchha laga
bevafa ik dushmanon ki pusht par achchha laga
vo achanak lauT aaya toḌ kar rasm-e-firaq
garmiyon men sard mausam ka samar achchha laga
lag ga.i shayad mujhe avargi ki bad-dua
lauT kar ab ke main aaya huun to ghar achchha laga
har kisi se hans ke milna ḳhush-dili se bolna
mera dushman hai magar us ka hunar achchha laga
ye mohabbat hai miri ya us ka hai koi kamal
jis qadar parkha use vo us qadar achchha laga
aane vaale mausamon ki saḳhtiyon ke zikr par
us ke chehre par akele-pan ka Dar achchha laga
ab ke us ke qurb ki jannat bhi dekhi paas se
ab ke mujh ko ḳhvab-zaron ka safar achchha laga
mere baare men mujhi se puchhta hai vo ‘na.im’
is ḳhabar ke daur men ik be-ḳhabar achchha laga
Leave a Reply