panjon ke bal khade hue shab ki chatan par
nakhun se ik kharash laga asman par
barson darun-e-sina sulagna hai phir hamen
lagta hai qufl-e-habs hava ke makan par
ik dhaad hai ki charon taraf se sunai de
girdab-e-chashm ban gaiin ankhen machan par
maujud bhi kahin na kahin iltava men hai
jo hai nishan par vo nahin hai nishan par
us men kamal us ki khabar-saziyon ka hai
khata huun main fareb jo sach ke guman par
sarkash ko nisf umr ka ho lene dijiye
bik jaega kisi na kisi ki dukan par
Leave a Reply