rida-e-rahat-e-kaun-o-makan oḌh ke dekh
zamin oḌh ke dekh asman oḌh ke dekh
tilism TuuT chuka jab charagh-e-zulmat ka
kabhi sabahat-e-nam-o-nishan oḌh ke dekh
paḌa rahega kahan tak tu apne tarkash men
ḳhadang-e-jasta agar hai kaman oḌh ke dekh
qarib aa hi gaya hai agar vo abr-e-karam
safar men aaj yahi sa.eban oḌh ke dekh
hava-e-shahr haqiqat men saans lete hue
nigar-ḳhana-e-vahm-o-guman oḌh ke dekh
phir ek baar kisi jang par nikalte hue
faza-e-qarya-e-amn-o-aman oḌh ke dekh
naya libas pahanne ka vaqt hai ‘sajid’
shikoh oḌh ke dekh an-ban oḌh ke dekh
Leave a Reply