aa ga.e phir tire arman miTane ham ko
dil se pahle ye laga denge Thikane ham ko
sar uThane na diya hashr ke din bhi zalim
kuchh tire ḳhauf ne kuchh apni vafa ne ham ko
kuchh to hai zikr se dushman ke jo sharmate hain
vahm men Daal diya un ki haya ne ham ko
zulm ka shauq bhi hai sharm bhi hai ḳhauf bhi hai
ḳhvab men chhup ke vo aate hain satane ham ko
chaar daghon pe na ehsan jatao itna
kaun se baḳhsh diye tum ne ḳhazane ham ko
baat karne ki kahan vasl men fursat ‘beḳhud’
vo to dete hi nahin hosh men aane ham ko
Leave a Reply