Shahida Majeed
ai ḳhirad aur junun ḳhuda-hafiz
ai dil-e-be-sukun ḳhuda-hafiz
ruḳhsati apni zaat se chahun
aaj ḳhud se kahun ḳhuda-hafiz
mujh ko izn-e-mafariqat hai dost
phir na shayad milun ḳhuda-hafiz
tujh ko mushkil hai to juda.i ki
ibtida main karun ḳhuda-hafiz
ye guman tak na tha mujhe ik din
tujh se kahna hai yuun ḳhuda-hafiz
ruuh ko karb se riha.i de
mere soz-e-darun ḳhuda-hafiz
Leave a Reply