raat bhar tanha raha din bhar akela main hi tha
shahr ki abadiyon men apne jaisa main hi tha
main hi dariya main hi tufan main hi tha har mauj bhi
main hi ḳhud ko pi gaya sadiyon se pyasa main hi tha
kis liye katra ke jaata hai musafir dam to le
aaj sukha peḌ huun kal tera saaya main hi tha
kitne jazbon ki nirali ḳhushbuen thiin mere paas
koi un ka chahne vaala nahin tha main hi tha
duur hi se chahne vaale mile har moḌ par
fasle saare miTane ko taḌapna main hi tha
meri aahaT sunne vaala dil na tha duniya ke paas
raste men ‘ashk’ be-maqsad jo bhaTka main hi tha
Leave a Reply