teri vafa par shak hai mujh ko baat na kar be-lag hava
un ki ḳhushbu le ke na aa.i bhaag yahan se bhaag hava
dete hain nafrat ka ujala nafrat ke napak diye
kyon na bujha.e tu ne ab tak vaqt-e-azan hai jaag hava
chhappar kuchh baaqi hain ab bhi nadaron ki qismat se
sho.alon ne jab tyaag diya hai tu bhi un ko tyaag hava
qismat men jal jaana ho to ghar se ghar ki duuri kya
pal bhar men uḌte kandhon par le jaati hai aag hava
nafrat ke sab kaale chehre nazron men aa ja.enge
‘shauq’ jo ghar ghar diip jala de ga kar dipak raag hava
Leave a Reply