Jaleel Hashmi
kahi na un se jo honTon pe baat aa.i bhi
ki ashna.i bhi thi sharam-e-ashna.i bhi
koi talab thi to dast-e-saval phailate
magar mili thi kahan surat-e-gada.i bhi
kaho hava se chale aaj raat tham tham kar
ki aag hai mire daman men kuchh para.i bhi
tire karam ke fasane to shahar bhar se kahe
tire sitam ki kahan ja ke den daha.i bhi
tiri sada pe guman dhaḌkanon ka hota tha
ajab tha ab ke sukut-e-shab-juda.i bhi
tumhari ham-safari ke bhi the bahut ehsan
hui hai vaj.h-e-nadamat shikasta-pa.i bhi
nazar bujhi to mile raushni kahan ‘hashami’
jala ke sham.a bahut aankh se laga.i bhi
Leave a Reply