Shahid Zaki
main apne hisse ki tanha.i mahfil se nikalunga
jo la-hasil zaruri hai to hasil se nikalunga
mire ḳhuun se zyada tu miri miTTi men shamil hai
tujhe dil se nikalunga to kis dil se nikalunga
mujhe ma.alum hai ik chor darvaza aqab men hai
magar is baar main rasta muqabil se nikalunga
shabihon ki tarah qabren mujhe avaz deti hain
main aks-e-raftgan a.ina-e-gul se nikalunga
hujum-e-sahl-angaran mire hamrah chalta hai
main jaise rah-e-asan rah-e-mushkil se nikalunga
bharam sab khol ke rakh dunga masnui mohabbat ke
koi taaza fasana dasht-o-mahmil se nikalunga
tumhen ab tairna ḳhud siikh lena chahiye ‘shahid’
tumhen kab tak main girdab-e-masa.el se nikalunga
Leave a Reply