Bahut Be-Kar Mausam Hai Magar Kuchh Kaam Karna Hai

Abbas Tabish

bahut be-kar mausam hai magar kuchh kaam karna hai

ki taaza zakhm milne tak purana zakhm bharna hai

abhi saada varaq par naam tera likh ke baitha huun

abhi is men mahak aani hai titli ne utarna hai

badhe jo habs to shakhen hila dena ki ab ham ko

hava ke saath jiina hai hava ke saath marna hai

mabada us ko diqqat ho nishane tak pahunchne men

so main ne phuul se divar ke rakhne ko bharna hai

yahi ik shaghl rakhna hai aziyyat ke dinon men bhi

kisi ko bhuul jaana hai kisi ko yaad karna hai

koi chehra na ban paaya muqaddar ki lakiron se

so ab apni hatheli men mujhe khud rang bharna hai

koi rasta mile kyunkar mire pa-e-khajalat ko

yahan to paanv dharna bhi koi ilzam dharna hai

vo har lamha dua dete hain lambi umr ki ‘tabish’

mujhe lagta hai pyaron ko bhi rukhsat main ne karna hai