Aftab Shamsi
der tak raat andhere men jo main ne dekha
mujh se bichhde hue ik shakhs ka chehra ubhra
qasmen de de ke mire hathon ne mujh ko roka
main ne divar se kal naam jab us ka khurcha
dekh kar us ko laga jaise kahin ho dekha
yaad bilkul nahin aaya mujhe ghanton socha
mom-batti ko galata raha dhire dhire
raat andhere ka mire kamre men bahta laava
kitne maghmum ghazalon ka bharam rakhta hai
narm kapde se tarasha hua kaala burqa
qadr ab ho ki na ho zehn-e-rasa ki lekin
aa hi jaata hai kabhi kaam ye khota sikka
saare din meri tarah jalta hai aur shaam dhale
har-bun-e-mu se lipat jaata hai mera saaya
apne honton pe saja leta huun main jhuti hansi
apni palkon men chhupa leta huun jalta dariya
maan lo meri jo hai us pe qanaat kar lo
ab nahin utrega is duniya men mann-o-salva
Leave a Reply