zinde vahi hain jo ki hain tum par mare hue
baaqi jo hain so qabr men murde bhare hue
mast-e-alast qulzum-e-hasti men aa.e hain
misl-e-habab apna piyala bhare hue
allah-re safa-e-tan-e-naznin-e-yar
moti hain kuuT kuuT ke goya bhare hue
do din se paanv jo nahin dabva.e yaar ne
baiThe hain haath haath ke uupar dhare hue
in abruon ke halqa men vo ankhḌiyan nahin
do taaq par hain do gul-e-nargis dhare hue
ba.ad-e-fana bhi aa.egi mujh mast ko na niind
be-ḳhisht-e-ḳham lahad men sirhane dhare hue
niklen jo ashk be-asar ankhon se kya ajab
paida hue hain tifl hazaron mare hue
likkhe ga.e bayazon men ash.ar-e-intiḳhab
raa.ij rahe vahi ki jo sikke khare hue
ulTa safon ko tegh ne abru-e-yar ki
tir-e-mizha se darham-o-barham pare hue
‘atish’ ḳhuda ne chaha to dariya-e-ishq men
kuude jo ab ki ham to vare se pare hue
Leave a Reply