Raaz-E-Nihan Zaban-E-Aghyar Tak Na Pahuncha

raz-e-nihan zaban-e-aghyar tak na pahuncha

kya ek bhi hamara khat yaar tak na pahuncha

allah re na-tavani jab shiddat-e-qalaq men

balin se sar uthaya divar tak na pahuncha

rote to rahm aata so us ke ru-ba-ru to

ik qatra khuun bhi chashm-e-khun-bar tak na pahuncha

ashiq se mat bayan kar qatl-e-adu ka muzhda

paigham-e-marg hai ye bimar tak na pahuncha

be-bakht rang-e-khubi kis kaam ka ki main to

tha gulvale kisi ki dastar tak na pahuncha

muft avval-e-sukhan men ashiq ne jaan de di

qasid bayan tera iqrar tak na pahuncha

thi khaar raah teri mizhgan ki yaad phir shab

ta-subh khvab chashm-e-bedar tak na pahuncha

bakht-e-rasa adu ke jo chahe so kahe ab

yak baar yaar mujh tak main yaar tak na pahuncha

ghairon se us ne hargiz chhodi na hatha-pai

jab tak ajal ka sadma do-char tak na pahuncha

‘momin’ usi ne mujh se di bartari kisi ko

jo past-fahm mere ashar tak na pahuncha

Leave a Comment