ehsas-e-avvalin
ek mauhum iztirab sa hai
ik talatum sa pech-o-tab sa hai
umde aate hain khud-ba-khud aansu
dil pe qaabu na aankh par qaabu
dil men ik dard mitha mitha sa
rang chehre ka phika phika sa
zulf bikhri hui pareshan-hal
aap hi aap ji hua hai nidhal
siine men ik chubhan si hoti hai
ankhon men kyuun jalan si hoti hai
sar men pinhan tasavvur-e-mauhum
haae ye arzu-e-na-malum
ek naala sa hai baghair avaz
ek halchal si hai na soz na saaz
kyuun ye halat hai be-qarari ki
saans bhi khul ke aa nahin sakti
ruuh men intishar sa kya hai
dil ko ye intizar sa kya hai