haath men apne hifazat ka asa le jaana
ghar se jaana to buzurgon ki dua le jaana
baat jab tark-e-ta.alluq hi pe aa pahunchi hai
apne ḳhat bhi mire kamre se uTha le jaana
jeb ḳhali hai magar dil men baḌi vus.at hai
tum mire gaanv ke logon se vafa le jaana
tere hathon men hai patvar miri kashti ki
tu jidhar chahe usi samt baha le jaana
mujh se milne ke liye vo bhi taḌapta hoga
mere ḳhvabo mujhe hathon pe uTha le jaana
pagḌiyan roz uchhalti hon jahan par ‘ejaz’
ham ne sikha vahan izzat ko bacha le jaana
Leave a Reply