paḌho ibarat-e-taḳhliq-e-dard chehre par
likhi hai karb ki rudad zard chehre par
chhupa rahi hai ḳhad-o-ḳhal jhurriyan ban kar
jami hui thi safar men jo gard chehre par
kamal-e-zabt to ye hai ki rang-e-mayusi
dam-e-shikast bhi jhalke na mard-chehre par
pighalti kyuun na bhala barf ajnabiyyat ki
nazar ki dhuup jo Thahri thi sard chehre par
main dhuul ahl-e-chaman meri qadr kya janen
mujhe sajate hain sahra-navard chehre par
har ek jism barahna lage vahan ‘azim’
jahan naqab rakhe fard fard chehre par
Leave a Reply