dil se ye kah raha huun zara aur dekh le
sau baar us ko dekh chuka aur dekh le
us ko ḳhabar hui to badal ja.ega vo rang
ehsas tak na us ko dila aur dekh le
sahra men kya dhara hai abhi shahr ko na chhoḌ
kuchh roz doston ki vafa aur dekh le
mausam ka e’tibar nahin badban na khol
kuchh der sahilon ki hava aur dekh le
sahra-e-arzu hai qadam dekh-bhal kar
kanTon ki samt abla-pa aur dekh le
hota koi to paanv ki aahaT se chaunkta
jangal hai kar ke ek sada aur dekh le
dil bhi to ik dayar hai raushan hara-bhara
ankhon ka ye charagh bujha aur dekh le
mumkin hai ek lamhe ki mehman ho bahar
phulon ki tazgi pe na ja aur dekh le
yuun kis tarah bata.un ki kya mere paas hai
tu bhi to koi rang dikha aur dekh le
dekhi thi ik jhalak ki uḌe rang har taraf
koi pukarta hi raha aur dekh le
‘shahzad’ zindagi ke jhamele hazar hain
duniya nahin pasand to aa aur dekh le
Leave a Reply