honton pe kabhi un ke mira naam hi aae
aae to sahi bar-sar-e-ilzam hi aae
hairan hain lab-basta hain dil-gir hain ghunche
khushbu ki zabani tira paigham hi aae
lamhat-e-masarrat hain tasavvur se gurezan
yaad aae hain jab bhi gham-o-alam hi aae
taron se saja lenge rah-e-shahr-e-tamanna
maqdur nahin subh chalo shaam hi aae
kya raah badalne ka gila ham-safaron se
jis rah se chale tere dar-o-bam hi aae
thak-har ke baithe hain sar-e-ku-e-tamanna
kaam aae to phir jazba-e-nakam hi aae
baaqi na rahe saakh ‘ada’ dasht-e-junun ki
dil men agar andesha-e-anjam hi aae
Leave a Reply