Tafazzulat Nahin Lutf Ki Nigah Nahin

tafazzulat nahin lutf ki nigah nahin

muamla abhi mutlaq vo ru-ba-rah nahin

ghalat hai aah ki hai dil ko dil se raah nahin

ki teri chaah mujhe tujh ko meri chaah nahin

ghulam ham to hain aise mizaj valon ke

kisi ke saath kisi Dhab ki jin ko raah nahin

hamari chori jo sabit hui dalil bhi kuchh

muqir nahin koi shahid nahin gavah nahin

tavazo aap ki ham kya karen bhala sahib

ba-qaul shaḳhse is apne jigar men aah nahin

rukha.iyan jo yahi hain to is tarah apna

nahin nahin nahin hargiz nahin nibah nahin

haram se dair men yaan ab-o-dana le aaya

ba-rabb-e-ka.aba mira is men kuchh gunah nahin

na kuchh jihat na sabab qah-qah hanste ho

tumhari ḳhush mujhe aati ye qah-qah nahin

kahun ba-qaid-e-qasam la-ilaha il-lallah

ki tab-e-hijr bas ab mujh men ai ilaah nahin