sukun-e-qalb kisi ko nahin mayassar aaj
shikast-e-khvab hai har shakhs ka muqaddar aaj
hai vaz-e-hal miri kyuun ye bad se bad-tar aaj
amir-e-shahr ke badle hue hain tevar aaj
har ek shakhs hai apne hisar men mahsur
hai sab ke dar-pae-azar vo sitamgar aaj
kiya hai gardish-e-dauran ne dar-ba-dar sab ko
jo sar men pahle tha vo paanv men hai chakkar aaj
samajh raha tha jise khair-khvah main apna
vahi hai dushman-e-jan mera sab se badh kar aaj
fasil-e-shahr ke andar the kitne ahl-e-hunar
nahin hai jin se shanasa koi bhi bahar aaj
dikha raha hai mujhe sabz baagh jo ‘barqi’
vo le ke phirta hai kyuun astin men khanjar aaj
Leave a Reply