Hui Ya Mujhse Nafrat Ya Kuchh isMein Kibr-O-Naz Aaya

Shauq Qidvai

hui ya mujh se nafrat ya kuchh is men kibr-o-naz aaya

kabhi vo muskura deta tha ab is se bhi baaz aaya

naya fitna jo nikla koi to ta.alim dilvane

zamana le ke us ko pesh-e-chashm-e-fitna-saz aaya

badalti rahti hai har dam miri shakl is qadar gham se

gaya jab main to samjha vo naya ik ishq-baz aaya

hui dil ki ḳhabar dil ko ki vo bad-zan hua varna

na Tapke ashk ankhon se na munh tak harf-e-raz aaya

bachaya dard se majbur kar ke tark-e-ulfat par

vo aaya dil-shikan ban kar to goya dil-navaz aaya

tire hathon shikast-e-dil men lutf-e-dil-navazi hai

ye kya kam hai ki pahlu tak tira dast-e-daraz aaya

magar taaza sitam ko vo miri sehat ka ḳhvahan hai

ki kal zaḳhmi kiya aur aaj ban kar charasaz aaya

ghubar-e-rah ne ankhen milane diin na dil bhar ke

vo mere ghar jo aaya le ke chashm-e-nim-baz aaya

hua hai ‘shauq’ mai-ḳhane men daḳhil kis takalluf se

bichhane ke liye masjid se le kar ja-namaz aaya