Shaad Aarfi
honTon par mahsus hui hai ankhon se ma.adum rahi hai
phulvari ki ”nighat-dulhan” phulvari men ghuum rahi hai
us ka anchal aur aveze mera matha chuum rahi hai
phir bhi chashm-e-bad-tinat pur-ulfat la-ma.alum rahi hai
har mai-kash ki zehni laghzish is mehvar par ghuum rahi hai
jaise vo sambhla baiTha hai jaise mahfil jhuum rahi hai
chunna hai to muskane se pahle chun lo koi kali bhi
gulshan men khilne se pahle tak be-shak ma.asum rahi hai
tum ishrat se farigh ho kar mujh se puchho main vaqif huun
kis kis bechare ki ḳhvahish naghmon se mahrum rahi hai
is se us se meri babat rozana sargoshi ya.ani
bante kyuun ho meri halat tum ko bhi ma.alum rahi hai
piine valon ke kahne se gham se chhuTkara paane ko
pi kar bhi meri tanha.i mayus o maghmum rahi hai
aariz aariz sub.h-e-baharan gesu gesu sham-e-nasheman
vo kya jaane jis ki ghaflat jalvon se mahrum rahi hai
main taḳh.ili naḳhlistan men ankhen band kiye baiTha huun
meri mustaqbil-andeshi manzil manzil ghuum rahi hai
varna sidhe-sade sajde varna sidhi-sadi hamden
duniya kya aur kyuun ke hathon bhari patthar chuum rahi hai
hamdardi ke munh par fan ki ankhen khulti hain ai ‘shad’
goya insani hamdardi sha.er ka maqsum rahi hai
Leave a Reply