Iqbal Tariq
sun mire dil ki zara avaz dost
ai mire mohsin mire hamraz dost
dil men hai ik vahshat-e-karb-o-bala
tu mire siine men bajta saaz dost
jo tapish suraj ki sah sakte nahin
vo kiya karte nahin parvaz dost
dard sahne men jinhen lazzat mili
pa sake vo log hi e.ajaz dost
zindagi bhar jo na bhar paa.e kabhi
baḳhsh tu is zaḳhm ka e.azaz dost
kya ḳhulus-e-adamiyat hai yahi
zindagi ka hai yahi andaz dost
kya bata.en raz-e-dil ab ham tujhe
dil se kab chhupta hai koi raaz dost
maut hai va.ada vafa karne ka naam
ik hayat-e-nau ka hai aghaz dost
ḳhvab hai ‘tariq’ ḳhayal-e-zindagi
pyaas ka sahra tiri avaz dost
Leave a Reply