munshi-naubat-rai-nazar-lakhnavi

Tere Wade Ka Har Ek Ko Agar Etibar Hota

tire vaade ka har ik ko agar e’tibar hota

to jahan men kuchh na hota faqat intizar hota

abhi kam hai soz-e-ulfat ki nafas sharar-fishan hai

agar aag tez hoti to ye shoala-bar hota

dil-o-tir-e-khun-chaka ki vo shabih khinch deta

jo lahu ka koi qatra sar-e-nok-e-khar hota

mujhe dard bhi tha rahat mujhe gham bhi tha masarrat

jo vo mujh ko ranj de kar kabhi gham-gusar hota

jo bhara hai gham se siina to sukut hi hai behtar

ki labon par aah aati to ik ishtihar hota

kabhi yuun mita na sakta use asman-e-zalim

tire dar pe o sitamgar jo mira mazar hota

ye hijab-e-jism-e-khaki ki hai diid ka munafi

kabhi darmiyan se uthta to visal-e-yar hota

na hua asar kisi par mire nala-e-hazin ka

tira tiir tha na zalim ki jigar ke paar hota

abhi aur tuul dete gham-e-ishq ko ‘nazar’ ham

agar apni zindagi ka hamen e’tibar hota

More Poems

Leave a Comment