is vahm ki intiha nahin hai
sab kuchh hai magar ḳhuda nahin hai
kya is ka suragh koi paa.e
jis chiiz ki ibtida nahin hai
khulta hi nahin fareb-e-hasti
kuchh bhi nahin aur kya nahin hai
is tarah sitam vo kar rahe hain
jaise mera ḳhuda nahin hai
tum ḳhush ho to hai mujhe nadamat
har-chand miri ḳhata nahin hai
dekho to nigah-e-vapsin ko
is ek nazar men kya nahin hai
duniya ka bharam na khol ai aah
ye raaz abhi khula nahin hai
har zarra hai shahid-e-tajalli
is husn ki intiha nahin hai
sargarm-e-talash rahne vaale
tera bhi kahin pata nahin hai
umDa hai jo dil ‘aziz’ ro lo
aansu koi rokta nahin hai
Leave a Reply