har ek ruḳh se mujhe lutf-e-justuju aa.e
zara vo aur qarib-e-rag-e-gulu aa.e
ma.al-e-naz-e-ḳhudi kya hai ye to samjha duun
jise ho naz-e-ḳhudi mere ru-ba-ru aa.e
baghair izn hi saaqi ne kar liya qabza
hamare vaste jab saghar-o-subu aa.e
qadam qadam pe hai ḳhuddari-e-hayat ka Dar
miri zaban pe kya harf-e-arzu aa.e
tiri faza-e-mohabbat ho ḳhush-gavar itni
nafas nafas se ḳhulus-o-vafa ki bu aa.e
hamare dil men adavat rahegi kya ‘ashraf’
nazar jhuka.e hue jab koi adu aa.e
Leave a Reply