Har Ek ruKH Se Mujhe Lutf-E-Justuju Aae

har ek ruḳh se mujhe lutf-e-justujū aa.e

zarā vo aur qarīb-e-rag-e-gulū aa.e

ma.āl-e-nāz-e-ḳhudī kyā hai ye to samjhā duuñ

jise ho nāz-e-ḳhudī mere rū-ba-rū aa.e

baġhair izn hī saaqī ne kar liyā qabza

hamāre vāste jab sāġhar-o-subū aa.e

qadam qadam pe hai ḳhuddārī-e-hayāt kā Dar

mirī zabān pe kyā harf-e-ārzū aa.e

tirī fazā-e-mohabbat ho ḳhush-gavār itnī

nafas nafas se ḳhulūs-o-vafā kī bū aa.e

hamāre dil meñ adāvat rahegī kyā ‘ashraf’

nazar jhukā.e hue jab koī adū aa.e

Leave a Comment