ye jism zaar hai yuun pairahan ke parde men
ki jaise ruuh nihan hai badan ke parde men
sivae ahl-e-sukhan ho mushahida kis ko
nihan hai shahid-e-maani sukhan ke parde men
talash jis ki hai din-rat tujh ko ai ghafil
chhupa hua hai vo tere hi tan ke parde men
jo andalib ki ankhon se dekhe vo samjhe
zuhur hai usi gul ka chaman ke parde men
shab-e-siyah judai men raushni ho kahin
lagaun aag main bait-ul-huzan ke parde men
tariq-e-ishq chhudaya hai tu ne gharat-gar
mila hai khizr mujhe rahzan ke parde men
latafat aisi hai tujh men ki dekhta huun saaf
guhar se daant hain durj-e-dahan ke parde men
ba-rang-e-zar koi kapdon men aag rahti hai
na mere daagh chhupenge kafan ke parde men
naqab se tire abru jo salkh ko khul jaaen
tu mah-e-nur hai charkh-e-kuhan ke parde men
agar tum aae the shirin ke bhes men sahab
to saath banda bhi tha kohkan ke parde men
numud ho na tire khatt-e-ambar-e-afshan ki
rahe vo jild ezar-o-zaqan ke parde men
chaman men laai saba kis ki bu jo aaj shamim
damak rahi hai gul-e-yasman ke parde men
nazar se tha sharar-e-sang ki tarah jo nihan
vo but mila mujhe ik but-shikan ke parde men
tumhare ru-e-mukhattat ka munh chidhate hain
ye mehr-o-mah pari-ru gahan ke parde men
hazaron pad gae tir-e-nigah se surakh
hamare is but-e-navak-fagan ke parde men
khabar na sham-e-gharibi ki mujh ko thi ‘nasikh’
chhupi hui thi ye subh-e-vatan ke parde men
Leave a Reply