Haalat Ki Ujdi Mahfil Mein Ab Koi Sulagta Saz Nahin

Qateel Shifai

halat ki ujdi mahfil men ab koi sulagta saaz nahin

naghme to lapakte hain lekin shoalon sa kahin andaz nahin

har barg-e-hasin ko dete hain zakhmon ke mahakte nazrane

kanton se bada is gulshan men phulon ka koi dam-saz nahin

ya saya-e-gul ka hai ye karam ya farq hai daane paani ka

panchhi to vahi hain gulshan men pahli si magar parvaz nahin

marqad sa bana hai khushbu ka munh band kali ke siine men

ai sham-e-gulistan tu hi bata ye bhi to kisi ka raaz nahin

chhilke na subu aur jhuum uthen qatra na mile aur pyaas bujhe

ye zarf hai piine valon ka saaqi ka koi eajaz nahin

ai sehn-e-chaman ke zindani kar jashn-e-tarab ki tayyari

bajte hain baharon ke kangan zanjir ki ye avaz nahin