Zaban Kuchh Aur Kahti Hai Nazar Kuchh Aur Kahti Hai

zaban kuchh aur kahti hai nazar kuchh aur kahti hai

ba-zahir ye tavajjoh chara-gar kuchh aur kahti hai

zamana naghma-paira.i ka jab aa.ega aa.ega

abhi to shiddat-e-soz-e-jigar kuchh aur kahti hai

bhala aap aur iḳhfa-e-haqiqat ai ma.az-allah

zaban-e-ḳhalq jhuTi hai agar kuchh aur kahti hai

koi kis tarah dhoka khaa.e is atish-bayani ka

udasi teri ai sham-e-sahar kuchh aur kahti hai

isi tashḳhis par itra raha tha ek muddat se

masiha dekh nabz-e-bahr-o-bar kuchh aur kahti hai

tiri azmat ka munkir tha na huun ai rahbar-e-kamil

ab is ko kya karun main rahguzar kuchh aur kahti hai

bharam ‘yaqub’ khulne hi ko hai ab asmanon ka

zamin se gardish-e-shams-o-qamar kuchh aur kahti hai