us maqtal-e-hasti se guzar ja.enge ham bhi
duniya yahi duniya hai to mar ja.enge ham bhi
ham se bhi ulajhte hain ba-har-gam ye saa.e
shayad ye samajhte hain ki Dar ja.enge ham bhi
jaise bhi hain insan hain ai bad-e-muḳhalif
tinke to nahin hain ki bikhar ja.enge ham bhi
ye tundi-o-tezi hai to lahron ke sahare
kashti na sahi paar utar ja.enge ham bhi
taufiq-e-gham-e-ishq bhi sab ko nahin milti
ḳhush hain ki ye ik kaam to kar ja.enge ham bhi
vo ḳhun-e-tamanna sahi har naqsh-e-vafa men
ik rang-e-dil-avez to bhar ja.enge ham bhi
ye ishq ki fitrat men vadi.at hai azal se
ik naqsh-e-hasin ban ke ubhar ja.enge ham bhi
sar-garm-e-safar vo bhi hai aur ham bhi musalsal
Thahra jo zamana to Thahar ja.enge ham bhi
har taaza taghayyur se ye kah do ki bil-aḳhir
har marhala-e-nau se guzar ja.enge ham bhi
ye jazb-e-mohabbat hai to phir sher hai kya shai
nashtar ki tarah dil men utar ja.enge ham bhi
dekha hai kuchh is tarah tira husn-e-jahan-tab
socha hai ki ta-hadd-e-nazar ja.enge ham bhi
ik aur bhi duniya hai jo is se bhi hasin hai
kho ja.enge jalvon men agar ja.enge ham bhi
guzre the kabhi sarmad-o-mansur jidhar se
us raah se be-ḳhauf-o-ḳhatar ja.enge ham bhi
saughat-e-mohabbat hain ye kuchh zaḳhm kuchh aansu
le kar yahi kuchh la.al-o-gohar ja.enge ham bhi
har-chand ki hai duur bhi dushvar bhi manzil
asar ye kahte hain magar ja.enge ham bhi
ye zauq-e-safar shauq-e-safar hai to yaqinan
‘rahi’ na sahi zad-e-safar ja.enge ham bhi
Leave a Reply